Статут

Член 1

• Политичката партија “Роми обединети од Македонија” (РОМ) е политичка организација (во понатамошниот текст – партија), која согласно уставните и законски одредби ќе ги застапува политичките, економските, социјалните, културните и другите права и интереси и уверување на своите членови, заземајќи политички ставови за сите значајни прашања од јавниот живот.

Член 2

• Името на партијата е: “РОМИ ОБЕДИНЕТИ ОД МАКЕДОНИЈА”.
• Скратеното име на партијата е “РОМ”.

Член 3

• Седиштето на партијата е во Скопје, општина Гази Баба, на адреса: Палмиро Тољати бр. 28

Член 4

• Партијата има свој печат во тркалезна форма, со пречник од 35 мм во кој, во горниот дел полукружно стои името на партијата, во средината стои знакот на партијата, а во долниот дел полукружно стои Скопје.
• Штембилот на партијата е во правоаголна форма во кој, во горниот дел стои името на партијата,во средината во два реда е означен просторот за број и датум а во долниот дел пишува Скопје.

Член 5

• Партијата има свој заштитен знак, знаме и партиска легитимација.

Член 6

• Политичката партија “Роми обединети од Македонија” е правно лице запишано, во единствениот регистар на политички партии кој се води кај надлежниот суд Основен Суд Скопје 2 – Скопје.

Член 7

• Политичката партија “Роми Oбединети од Македонија” дејствува во согласност со Уставот и Законите на Република Македонија.

Член 8

• Партијата може да остварува соработка и со други политички субјекти и организации од земјата и од странство, да стапува во коалиција со други партии и да членува во соодветни странски организации. За начинот на соработка и членување, одлука донесува Извршниот комитет на партијата.

Член 9

• Партијата е самостојна, демократска, граѓанска, и отворена за сите кои сакаат да пристапат во неа, како и своите права, должности и одговорности партијата ги остварува согласно со Уставот на Република Македонија, законите и другите правни прописи.

Член 10

Партијата се залага за:

• Заштита и афирмација на суверенитетот и интегритетот на Република Македонија;
• Јакнење и интегрирање на Ромите во главните општествени текови на државата;
• Промовирање на мирен и хармоничен живот со припадниците на другите националности;
• Унапредување на еднаквоста и толеранцијата за подобрување на односите на етничките заедници во Република Македонија;
• Промовирање на позитивни кампањи за подигање на свеста за заштита од дискриминација;
• Промовирање на позитивни мерки за подигање на нивото на образованието, здравството, домувањето, вработувањето, културата и сл;
• Конструктивен, прагматичен и не-дискриминаторска политика;
• Промовирање и унапредување на заштита на основните човекови права и слободи;
• Промовирање на еднакви можности и пристап кон постојните можности за унапредување на статусот на Ромите;
• Промовирање на практични мерки за еднаков пристап на Ромите до пазарот на трудот.

Член 11

• Подобрување на основните услови за живеење на Ромите во Република Македонија;
• Остварување на социјална еманципација на Ромите во Република Македонија;
• Развој и промоција на Ромската култура, јазик и традиција;
• Подобрување на социо-економскиот статус и промовирање на сеопфатни политики за социјална инклузија на Ромите;
• Организирање на јавни дебати и настани.

Член 12

• Со цел, остварување на своите програмски цели и задачи, политичката партија Роми Обединети од Македонија делува во Република Македонија и во други држави, во согласност со Уставот и Законите на Република Македонија и законите на соодветната држава.

Член 13

• Партијата работи транспаретно, остварува редовни средби со граѓаните, остварува соработка со медиумите, преку организирање на конференции за печат, преку соопштенија, преку пишани и електронски медиуми, како и други форми на информирање на јавноста.

ЧЛЕН 14

• Членувањето и пристапувањето во партијата е доброволно;
• Член на партијата може да биде секој полнолетен граѓанин, државјанин на Република Македонија;
• Член на партијата се станува со потпишување на пристапница;

ЧЛЕН 15

• Членовите на партијата ги остваруваат своите права согласно статутот на партијата;
• Учествува во работата и активностите на партијата;
• Дава свои предлози, мислења и ставови;
• Учествува во работата на телата и органите на партијата во кој е избран;
• Учествува во остварувањето на целите, задачите и активностите на партијата;
• Да биде информиран за активностите и дејствувањето на партијата;

ЧЛЕН 16

• Работи на остварување на Програмата, Статутот, ставовите и одлуките на партијата;
• Се придружува кон програмските цели, документи, Статут и други акти на партијата;
• Дава заложба за остварување на успешна работа на партијата, го чува угледот и идентитетот на партијата;
• Дава свои прилози, донација и доброволна членарина;

ЧЛЕН 17

• Истапува, од денот на потпишување на истапница;
• Доколку дејствува и работи спротивно на Статутот, Програмата, целите, задачите и интересите на партијата;
• Зачленување во друга политичка партија;
• Трајно губење на деловна способност;
• Смрт.

ЧЛЕН 18

• Собрание
• Претседател
• Два потпретседатели
• Генерален секретар
• Претседателство
• Извршен комитет
• Статутарна комисија
• Тело за финансиско-материјално работењe

ЧЛЕН 19

• Собранието е највисок орган во партијата со мандат во траење од пет години.

ЧЛЕН 20

• Собрането се одржува по потреба, а најмалку еднаш на пет години;
• Собранието се свикува со одлука на Извршен комитет
• Собранието се свикува со писмена покана во кој е содржан дневниот ред
• Собранието може полноправно да работи и одлучува доколку присуствуваат повеќе од половина од вкупниот број делегати, и да донесува одлуки со просто мнозинство на гласови од вкупниот број на присутни.

ЧЛЕН 21

Собранието ги има следниве права, должности и одговорности:

• Донесува, менува и дополнува Програма на предлог на органите на партијата;
• Утврдува насоки за работа на партијата;
• Усвојува годишен извештај за работа на партијата
• Разгледува други прашања сврзани со работата на партијата;
• Избира Претседател на партијата;
• Избира членови на телото за материјално-финансиско работење на партијата;
• Избира членови на статутарната комисија;
• Донесува Деловник за својата работа
• Донесува одлуки и други акти во интерес на партијата.

ЧЛЕН 22

• Претседателот е политичко извршен орган кој ја претставува и застапува партијата.
• Мандатот на Претседателот на партијата трае пет години, со право на повторен избор;

ЧЛЕН 23

• Раководи со партијата и учествува во креирањето на политиката и носењето одлуки во интерес на партијата;
• Ја води кадровската политика на партијата;
• Претседателот се грижи за спроведување на одлуките и заклучоците донесени на Собранието и Извршниот комитет;
• Претседателот на партијата може да овласти и други лица како застапници на партијата, со јасни прецизирани овластувања и дефинирано време траење;
• Предлага избор и разрешување на членови на Претседателството, Потпретседатели и Генерален секретар на партијата;
• Свикува и раководи со седниците на Извршниот комитет и Претседателството.

ЧЛЕН 24

• Потпретседателот на партијата го заменува и му помага на претседателот во извршувањето на неговите должности и одговорности, а по претходно овластување на Претседателот и во согласност со овој Статут;
• Мандатот на потпретседателот е во време траење од пет години и вршат работа од делокругот на Претседателот на партијата, што тој ќе им ја довери со посебно овластување.

ЧЛЕН 25

• Се грижи за реализација на Програмата за работа, како и се грижи за остварување на донесените ставови и заклучоци на партијата.

ЧЛЕН 26

• Генералниот секретар е извршен политичко лице, кој се избира и разрешува на предлог на Претседателот на партијата, од страна на Извршниот комитет;
• Мандатот на Генералниот секретар е во време траење од пет години.

ЧЛЕН 27

• Генереалниот секретар ја организира подготовката на седниците на Собранието, на Претседателството и на Извршниот комитет;
• Ја организира архивската евиденција и документацијата на партијата;
• Предлага секретари и ја насочува нивната работа;
• Го следи извршувањето на оперативно/политичките ставови, одлуки и заклучоци на партијата;
• Учествува во креирањето на политиката на партијата и предлага организациониот секретар;
• Работи согласно деловникот за работа.

ЧЛЕН 28

• Претседателството на партијата е политичко извршен орган, кој делува врз основа на политичките насоки, заклучоци и задачи на Претседателот на партијата и на Централниот совет.
• Мандатот на членовите на Претседателството е во време траење од пет години, а се избираат од страна на Извршниот комитет на предлог на Претседателот на партијата.

ЧЛЕН 29

• Претседателството работи на седници кои ги свикува, раководи и заседава Претседателот на партијата;
• Членовите на Претседателството за својата работа одговараат пред Претседателот на партијата и пред Извршниот комитет;
• Донесува одлуки за организација на терен;
• Носи одлуки за формирање на други тела на партијата;
• Донесува одлуки за основање на општински клубови, унии, асоцијации, комисии и форуми;
• Донесува деловник за работа на Претседателството.

ЧЛЕН 30

• Извршниот комитет е извршен орган кој ги врши оперативно-политичкте работи;
• Мандатот на членовите на Извршниот комитет е во време траење од пет години.

ЧЛЕН 31

• По функција членови на Извршниот комитет се и Претседателот, Потпретседателите, Генералниот секретар и други членови кои ќе ги избере Извршниот комитет на предлог на Претседателот.

ЧЛЕН 32

• Седниците на Извршниот комитет ги свикува и со нив раководи Претседателот на партијата, а во случај на негова спреченост или отсуство, седниците може да ги свика и со нив да раководи еден од потпретседателите на партијата овластен од страна претседателот на партијата;
• Извршниот комитет на предлог на Претседателот: избира Потпретседатели, Генерален секретар и членови на Претседателството;
• Избира носители на други партиски функции;
• Носи одлуки за соработка, коалиција или заеднички настап со други политички партии;
• Предлага одлуки, ставови и заклучоци до Претседателството на партијата;
• Донесува одлуки од материјално финансиски карактер;
• Остварува и други права, должности и одговорности што ќе му ги довери Претседателството;
• Решава и други прашања поврзани со работата на партијата;
• Носи изборна програма;
• Донесува деловник за својата работа;
• Дава политички насоки за делување на партијата.

ЧЛЕН 33

• Статутарната комисија се избира и разрешува на предлог на Претседателот;
• Мандатот на членовите на Статутарната комисија е во време траење од пет години;
• Статурната комисија е надлежна за контрола на статутарноста на сите одлуки и таа може да ги поништи доколку утврди дека се спротивни на Статутот на партијата;
• Донесува деловници и правилници за својата работа и работата на другите органи и тела на партијата;

ЧЛЕН 34

• Телото за материјално-финансиско работење го избира и разрешува Собранието по предлог на Претседателот на партијата;
• Мандатот на членовите на телото за материјално-финансиско работење е во време траење од пет години;
• Телото за материјално-финансиско работење го сочинуваат Претседател и најмалку два члена;
• Работи согласно донесен Деловник за работа.

Член 35

• Партија “Роми Обединети од Македонија” ќе делува на цела територија на Република Македонија преку свои клубови и тоа:
• Општински клубови
• Месни клубови
• Клубови на избирачки места,
• Истите ќе бидат основани, организирани и ќе делуваат врз основа на Деловници за работа донесени од Извршниот комитет на партијата, а во согласност со Статутот и Програмата на партијата.

Член 36

• Партијата “Роми Обединети од Македонија” (РОМ) ќе формира организација на млади.

Член 37

• Одлуката за формирање на Клуб на млади ја донесува Извршниот комитет на предлог на Претседателот, а ќе делува во согласност со програмските определби на органите на партијата односно Статутот и Програмата на партијата, како и врз основа на Деловникот за работа на Клуб на млади (РОМ).
• Членовите на Клуб на млади (РОМ) за своето делување се одговорни пред Претседателот на партијата, Извршниот комитет и Претседателството.

Член 38

• Партијата “Роми Обединети од Македонија” (РОМ) ќе формира клуб на женски актив.

Член 39

• Одлуката за формирање на Клуб на женски актив ја донесува Извршниот комитет на предлог на Претседателот, а ќе делува во интерсес на унапредувањето на положбата на жените Ромки, во согласност со програмските определби на органите на партијата односно Статутот и Програмата на партијата, како и врз основа на Деловникот за работа на Клуб на женски актив (РОМ).
• Членовите на Клуб на женски актив за своето делување се одговорни пред Претседателот на партијата, Извршниот комитет и Претседателството.

ЧЛЕН 40

• За остварување на своите цели и задачи, партијата ќе се стекнува со парични и други материјални средства согласно со закон и овој Статут
• Партијата ќе се финансира од сопствени средства, предмети и материјални добра кои се обезбедуваат од членарина, доброволни прилози, приходи, сопствен имот, подароци, дотации, легати, донации од странство, Буџетот на Република Македонија, како и други начини утврдени со закон.

ЧЛЕН 41

• Стекнувањето, користењето и располагањето со средствата на партијата се врши на начин утврден со Закон;
• Средсвата на партијата може да се користат само за намени утврдени со финансиски план и врз основа на соодветен документ.

ЧЛЕН 42

Партијата обезбедува известување на јавноста за својат работа преку:

• Слободно присуство на нејзините членови како и на други заинтересирани лица на седниците на нејзините органи и нивните работни тела;
• Достапност на извештаите и другите материјали од работата партијата до членовите и другите заинтересирани лица , како и нивно доставување до јавноста;
• Организирање на конференции за медиумите;
• Издавање на билтени и други публикации;
• Други начини кои овозможуваат навремено и вистинито известување на јавноста за работата на партијата.

ЧЛЕН 43

Партијата може да престане со работа ако:

• На политичката партија и е забрането дејствување со правосилно решение, во согласност со одредбите од овој Закон;
• Политичката партија поднесе барање за бришење од Судскиот регистар;
• Врз основа на правосилно решение за бришење на политичката партија од Судскиот регистар, донесено од страна Судот врз основа на овој Закон;
• Доколку било која од причините утврдени со Законотот за политичките партии за забрана на работа на партијата.

ЧЛЕН 44

• Кога партијата ќе престане со работа, средствата што остануваат по намирувањето на нејзините обврски се пренесува на некоја од хуманитарните организации кој работат во делот на унапредувањето на статусот и положбата на Ромите во Република Македонија.

ЧЛЕН 45

• Партиското лого се состои од стилизирана книга која по истакнатите бои го симболизира националното обележје на Ромите.
• На логото на партија ја има застапено зелената, црвената и сината боја, кои по својата особина и препознатливост на боите го означува знамето на Ромите.
• Зелената боја ја означува земјата, сината боја го означува небото, додека црвената боја го претставува движењето и интеграцијата на Ромите.
• Книгата симболизира знаење, успех, умешност и интелектуална моќ за унапредување на положбата на Ромите.
• На средината на логото е испишан текст со натпис РОМ, кратенката од името на партијата, што значи Роми Обединети од Македонија.

ЧЛЕН 46

• Партиското знаме е правоаголно со пропорции 2:1. Со бела основа на која во средината се аплицира заштитниот знак на партијата.
• Изгледот, форматот, содржината, нумерирањето и начинот на издавање на партиската легитимација се утврдува со одлука на Извршниот комитет на партијата.

ЧЛЕН 47

• Претседателот на партијата ги презема сите овластувања на сите партиски органи во случај на војна, вонредна или друга состојба која оневозможува организирање и работење на истите, а е потребно носење на брзи и итни одлуки во интерес на партијта, Република Македонија и нејзините граѓани.

ЧЛЕН 48

• Измените и дополнувањето на овој Статут ги врши Собранието на РОМ, со мнозинство гласови од вкупниот број на членови присутни на Собранието.
• Прашањата што не се уредени со овој Статут ќе ги регулира Извршниот комитет со посебни акти, во согласност со законските прописи и овој Статут;
• Овој Статут е усвоен на основачко собрание на политичката партија “Роми обединети од Македонија”, одржано на ден 01.03.2014 година;
• Овој Статут влегува на сила наредниот ден по неговото донесување.